नमोबुद्धका सडकछेउमा वृक्षारोपण



भकुण्डेबेशी, विपी राजमार्गअन्तर्गत नमोबुद्ध नगरपालिकाको भकुण्डे बजारमा सडकको दायाँवायाँ वृक्षारोपण सुरु गरिएको छ ।
वातावरणमैत्री नमोबुद्ध नगर बनाउने अभियानअन्तर्गत डिभिजन वन कार्यालय काभ्रेसँगको सहकार्यमा बजार क्षेत्रमा सडकको दायावायाँ अशोकाका बिरुवा रोप्न थालिएको छ । हिजो आयोजित कार्यक्रममा नगर प्रमुख टिपी शर्मा तिमल्सिनाले वृक्षारोपण कार्यको सुरुवात गरे । आफूहरु निर्वाचित भएदेखि नै वातावरणमैत्री नगरपालिका बनाउने प्रतिवद्धताअनुसार काम गरिरहेको र त्यसैको निरन्तरतास्वरुप सडकको दुबैतर्फ वृक्षारोपण थालिएको तिमल्सिनाले बताए । उनले वातावरणमैत्री नमोबुद्ध बनाउने अभियानमा साथ दिएकोमा डिभिजन वन कार्यालय काभ्रेलाई धन्यवादसमेत दिए । नगरपालिकाले सबै वडामा एक वडा एक चौतारो तथा एक वडा एक पोखरी निर्माणको कार्यलाई अभियानकै रुपमा सञ्चालन गरेको उनले बताए । उनले वन कार्यालयको सहयोगमा रोपिएका बिरुवा संरक्षणको जिम्मा नगरपालिकाले लिने पनि बताएका थिए ।
कार्यक्रममा नमोबुद्ध नगरपालिकाका प्रमुख प्रशासकीय अधिकृत राजन पौडेल, डिभिजन वन कार्यालय काभ्रेका डिभिजनल वन अधिकृत देवीचन्द्र पोखरेल, नेपाली कांग्रेसका नमोबुद्ध नगर सभापति कुन्साङ लामा लगायतले वृक्षारोपण गरेका थिए । कार्यक्रममा डिभिजन वन कार्यालयका डिभिजन वन अधिकृत पोखरलेलले वन तथा वातावरण मन्त्रालयले देशव्यापीरुपमै जंगलमा वृक्षारोपणका साथै अहिले नगरक्षेत्र, ऐलानी तथा पर्ति जग्गामा अभियानकै रुपमा वृक्षारोपण गर्ने तथा उद्यान बनाउने कार्यलाई अघि बढाएको बताए । डिभिजन वन कार्यालय काभ्रेका सहायक वन अधिकृत न्हुच्छेकृष्ण श्रेष्ठले वन कार्यालय र नगरपालिकाको सहकार्यमा रोपिएका बिरुवाको सरक्षणको दायित्व नगरपालिका तथा नगरबासीको भएको बताए ।
नमोबुद्ध नगरपालिकाका वातावरण अधिकृत सन्तोष काफ्लेका अनुसार डिभिजन वन कार्यालयको १२ लाख रुपैयाँ आर्थिक सहयोगमा रोपिएका बिरुवा जोगाउने ‘ट्रि गार्ड’सहित २ सय ५० वटा अशोकाका बिरुवा रोपिनेछ । यसले वातावरणमैत्री नमोबुद्धको अभियान सफल बनाउन मद्दत पुग्ने काफ्लेले जानकारी दिए ।

प्रतिक्रिया दिनुहोस्