महिलाका लागि स्कुटर ड्राइभिङ तालिम


भकुण्डेबेशी, नमोबुद्ध नगरपालिकामा महिलाहरुका लागि स्कुटर ड्राइभिङ तालिम सञ्चालन गरिएको छ । सोमबारदेखि सुरु भएको तालिमको नगरप्रमुख टिपी शर्मा तिमल्सिनाले उद्घाटन गरेका छन् ।
नमोबुद्ध नगरपालिका उपप्रमुख रामदेवी तामाङको अध्यक्षतामा भएको तालिमको उद्घाटन कार्यक्रमममा नगर प्रमुख तिमल्सिनाले स्कुटर सिकेपछि लाइसेन्स प्राप्त गर्ने महिलाका लागि गाडी चलाउन सिकाउने प्रतिवद्धता जनाए । कार्यक्रममा नगरपालिका उपप्रमुख रामदेवी तामाङले विगतमा पूर्वाधार निर्माणको काम अघि बढाइएकोमा अब सीप विकासमा नगरपालिकाले जोड दिएको बताइन् । नगरपालिकामा जनप्रतिनिधि निर्वाचित भएपछि प्रत्येक बर्ष महिला सशक्तिकरणको क्षेत्रमा बजेट वृद्धि गर्दै लगिएको उनको भनाई थियो । कार्यक्रममा नगरपालिकाका प्रमुख प्रशासकीय अधिकृत राजन पौडेलले महिला घरबाहिर महिलाको जति बढी संलग्नता हुन्छ त्यति धेरै क्षमताको विकास हुने बताए ।
तालिममा नगरपालिकाका महिला जनप्रतिनिधि र महिला संस्थाका प्रतिनिधिसहित ४२ जनाको सहभागिता रहेको छ । तालिम चैत १६ गतेसम्म सञ्चालन हुने नमोबुद्ध नगरपालिका महिला तथा बालबालिका शाखा प्रमुख तारादेवी सुनुवारले जानकारी दिइन् ।

प्रतिक्रिया दिनुहोस्