‘हेमबहादुर मल्ल सम्मान २०७५’ डा. गौरी शंकरलाई दिने घोषणा


दुई लाख राशी सहितको हेमबहादुर मल्ल सम्मान २०७५ डा. गौरी शंकरलाल दासलाई दिने घोषणा गरिएको छ । साल्ट ट्रेडिङ कर्पोरेशन लिमिटेड र नेपाल जन प्रशासन संघद्वारा शुक्रबार संयुक्त रुपमा आयोजित कार्यक्रममा सो घोषणा गरिएको हो ।

सो अवसरमा नेपाल जन प्रशासन संघका अध्यक्ष कृष्ण हरि बास्कोटाले विभिन्न क्षेत्रबाट आएका सिफारिस मध्येबाट नामहरू छनौट गर्दै विभिन्न चरणहरु पारगरी अन्तत छनौट समितीको सिफारिसका आधारमा दासलाई सो सम्मानबाट विभुसित गर्ने निर्णय लिईएको बताउनुभयो ।

‘राज्यको उच्च ओहोदामा रही सार्वजनिक सेवा प्रवाह र व्यवस्थापनका क्षेत्रमा राष्ट्रको छवी उच्च राख्न सफल भएको, उच्च प्रशासकका रुपमा नेतृत्वदायी क्षमताको प्रदर्शन गरेको, सामाजिक सेवामा समर्पित रहेको र अन्तर्राष्ट्रिय क्षेत्रमा नेपालीको पहिचान निर्माण गरेको जस्तो उल्लेखनिय कार्य गरे बापत हेमबहादुर मल्ल सम्मान, २०७५ का लागि डा. गौरी शंकर लाल दासलाई सर्वाधिक योग्य ठहर गरिएको हो’ उक्त सम्मान गौरी शंकर लाल दासलाई नै किन ? भन्ने बारेमा स्पस्ट पार्दै अध्यक्ष बाँस्कोटाले भन्नुभयो ।

साथै पूर्व मन्त्री एवम् सचिव माधव पौडेल संयोजकत्वमा गठित पाँच सदस्यिय छनौट समितीले दासलाई छनौटमा पर्नेहरू मध्ये सर्वोकृष्ट ठहर गरेको पनि अध्यक्ष बाँस्कोटाले जानकारी दिनुभयो । सो अवसर माझ बोल्दै साल्ट ट्रेडिङ कर्पोरेशन लिमिटेडकी प्रमुख कार्यकारी अधिकृत उर्मिला श्रेष्ठले कर्पोरेशनका पूर्व महाप्रबन्धक हेमबहादुर मल्ल एक कुशल व्यवस्थापक भएको स्मरण गर्दै उहाँको स्‍मृतिमा राष्ट्र सेवामा समर्पित प्रशासक एवम् व्यवस्थापकहरूलाई सम्मान गर्ने पुनित कार्यमा जोडन पाएकामा कर्पोरेशन परिवारले गर्व महशुश गर्दै आएको धारणा राख्नुभयो ।

प्रमुख कार्यकारी अधिकृत श्रेष्ठले हेमबहादुर मल्लको पदचापलाई नेपालको प्रशासनिक एवम् समग्र व्यवस्थापनको क्षेत्रले सिको गर्न सकेको खण्डमा सुशासन र विकास कार्यमा टेवा मिल्ने आशय व्यक्त गर्नुभयो । साथै उहाँले कर्पोरेशनले हालका दिनहरूमा जनउत्तरदायी भूमिका निर्वाह गर्ने क्रममा उपभोग्य अधिकारलाई प्रत्याभुत गर्न कर्तव्यनिस्ठ भएर लाग्दै आएको पनि स्पस्ट पार्नुभयो ।

यसअघि हेमबहादुर मल्ल सम्मानबाट विभुसित हुनेहरूमा केदारभक्त माथेमा, चादनी जोशी, भगवान कोईराला, विमल कोइराला, महाविर पुन, अम्बिका श्रेष्ठ, भोजराज पोखरेल, डा. दमननाथ ढुङ्गाना, डा. सुरेश राज शर्मा, खिलराज रेग्मी, उमेश मैनाली, दामोदार रेग्मी, देवेन्द्र राज कँडेल, कुलमान घिसिङ र सुन्दुक रूइत हुनुहुन्छ । यो सोह्रौ सम्मान समर्पण हो ।

डा गौरी शंकर लाल दास पेशाले चिकित्सक र प्रशासक हुनुहुन्छ । वि. स. २००९ सालदेखि उहाँले वीर अस्पतालमा रेजिडेन्ट मेडिकल अफिसरका रुपमा स्वास्थ्य सेवा आरम्भ गर्नुभएको थियो । उहाँले वि. स. २०२४ सालमा स्वास्थ्य सेवा विभागको निर्देशकहुँदै स्वास्थ्य मन्त्रालयको प्रमुख योजना अधिकृत भएर काम गर्नुभएको थियो । त्यसैगरी उहाँले सन् १९७५ देखि१९९० सम्म विश्व स्वास्थ्य संगठनमा आवद्ध रही अन्तर्राष्ट्रिय स्तरमा काम गर्नुभएको थियो । डा. दासले २०३५ देखि २०४७ सालसम्म लोकसेवा आयोगको सदस्य र २०५७ देखि २०६२ सालसम्म राष्ट्रिय मानव अधिकार आयोगको सदस्य भई सेवा गर्नुभएको थियो । साथै उहाँ एक दर्जन भन्दा बढी सामाजिक संघ संस्थामा आवद्ध हुनुहुन्छ । सिरहाको इनरुवामा जन्मिनुभएका दास हाल ९६ बर्ष टेक्दै हुनुहुन्छ ।

प्रतिक्रिया दिनुहोस्